આદર્શ અકાદમી
શ્રી બનાસકાંઠા આંજણા-પટેલ કેળવણીમંડળ દ્વારા શિક્ષણોત્કર્ષના સંકલ્પને લીધે માતૃશ્રી આર.વી. ભટોળ ઇંગ્લિશ મીડિયમ કેમ્પસમાં એક નવી સંસ્થા જૂન ૨૦૨૧ થી મૂર્તિમંત થઈ. -નામકરણ : આદર્શ અકાદમી બનાસકાંઠા આંજણા-પટેલ કેળવણી મંડળ સંચાલિત બધીજ સંસ્થાઓ ‘આદર્શ’ના હુલામણા નામ સાથે જોડાયેલી છે, તેથી નવી સ્કૂલના નામકરણમાં ‘આદર્શ’ શબ્દ જોડાય તે સૌથી વધુ ઉચિત બાબત હતી, વળી શિક્ષણ સંસ્થા માટે કોઈ Unique (અનન્ય) શબ્દ ની શોધ આદરી અને એમાં અંગ્રેજી શબ્દ ACADEMY સુંદર જણાયો પણ તેને ગુજરાતી રંગ આપી ‘અકાદમી’ શબ્દ પસંદ કર્યો અને આમ આ નવી સંસ્થાનું નામ ‘આદર્શ અકાદમી’ નિર્ધારિત કર્યું. -MOTTO : સ્કૂલે તેના આવિર્ભાવની સાથે જ એક ધ્યેય પણ સ્વીકાર્યો છે અને એ છે, બાળક પ્રત્યે સમાનુભૂતિ. સ્કૂલની વિચારધારામાં વિદ્યાર્થી પ્રત્યે દયાનો ભાવ છે જ નહીં, સહાનુભૂતિની વાત બિલકુલ જ નથી. જ્યાં સહાનુભૂતિ હોય, ત્યાં અહેસાનની વાત આવે. જ્યાં સહાનુભૂતિ હોય, ત્યાં બાળક સંકુચિતતા અને લઘુતાગ્રંથિથી પીડાવાનો જ. એટલે જ સહાનુભૂતિને બદલે સમાનુભૂતિનો સ્વીકાર કર્યો છે. બાળકને વિષે સહાનુભૂતિથી વિચારવાની વાત નથી, પણ બાળકને સ્થાને જઈને પરિસ્થિતિ સમજવાની વાત છે. જે-તે બાળક બની જઈને એની પરિસ્થિતિનો તાગ મેળવવાનો છે અને અનુકાર્ય કરવાનું છે. આ વિચારધારાને સ્ફુટ કરતું વાક્ય ધ્યેયવાક્ય તરીકે સ્વીકારી logoની નીચે સંસ્કૃતમાં લખ્યું છે: -ધ્યેય (Vision): શહેરની, મોટી મસ ફી વાળી સ્કૂલોના શિક્ષણની સામે, નજીવી ફી લઈ અંતરિયાળ ગામડાંના પ્રતિભાવાન વિદ્યાર્થીઓને નિવાસી તાલીમ આપી શહેરી વિસ્તારના વિદ્યાર્થી-સમકક્ષ બનાવી સાક્ષરી શિક્ષણ ઉપરાંત મૂલ્યશિક્ષણથી સભર બનાવી દેશના અને સમાજના ઉત્તમ નાગરિકો બનાવવા. -લક્ષ્ય (Mission): માત્રપ્રતિભાની બુનિયાદ પર ; વિસ્તાર, બોલી-ભાષા, લિંગ, જાતિ, આર્થિક ક્ષમતાના ભેદભાવ વગર પ્રવેશ આપી વિદ્યાર્થીઓને નિવાસી શિક્ષણ વડે સમૃદ્ધ કરવા. છાત્રાવાસ અને સ્કૂલમાં મૂલ્યશિક્ષણ માટે ઔપચારિક તાલીમના વિશિષ્ટ અભ્યાસક્ર્મ સાથે કામ કરવું. ધોરણ-9 થી જ લક્ષ્યનિર્ધારણની તાલીમ આપી વિદ્યાર્થીઓમાં નિર્ણયશક્તિ વિકસાવવી અને ધ્યેયને હાંસલ કરવાનું પ્રશિક્ષણ આપવું. જીવનમાં વિધેયાત્મક્તા (હકારાત્મકતા) લાવવા માટે અભ્યાસક્ર્મમાં વિવિધ શિક્ષણાનુભવો ઉમેરવા.
