શ્રીમતી હેતીબેન રતુભાઈ કરશનભાઇ કાથરોટીયા ઉચ્ચ પ્રાથમિક શાળા

         આ વાત છે પાલનપુરની શ્રીમતી હેતીબેન ર.ક. કાથરોટીયા (આદર્શ) પ્રાથમિક શાળાની. એ ઘેઘૂર વડલો તેની ગવાહી પૂરે છે. એની શીળી છાયામાં ઋષિકુળ પરંપરા અનુસાર કુદરતને ખોળે એક સુકન્યા રમતી હોય તેમ આ સંસ્થાએ શૈશવ ગાળ્યું. એક વિશિષ્ટ આદર્શ લઈ જન્મ થયો હોઈ તેનું નામાભિધાન થયું “આદર્શ પ્રાથમિક શાળા.”

                        સમયની માંગ અને સમાજની જરૂરિયાતને ધ્યાનમાં રાખી આ શાળાને નમૂનેદાર શાળા બનાવવાની નેમવાળા સંચાલકમંડળે તેના વિકાસ અને વિસ્તારના પ્રયત્નો આદર્યા. આ પ્રયત્નોના ફળરૂપે, માં અર્બુદાના આશીર્વાદથી સમાજના જ ભામાશા તેમજ માતૃપિતૃ તથા માતૃભૂમિનું ઋણ અદા કરવા તત્પર એવા શિક્ષણપ્રેમી પટોસણ નિવાસી માન.શ્રી ગિરીશભાઈ રતુભાઈ કાથરોટીયા(હાલ.યુ.એસ.એ.)એ માતબર રકમનું દાન આપ્યું. એટલે વર્ષ-૨૦૦૦ થી આ શાળા તેમના માતૃશ્રીના પવિત્ર નામ " શ્રીમતી હેતીબેન રતુભાઈ કરશનભાઇ કાથરોટીયા" પ્રાથમિક શાળાના નામે જાણીતી થઈ. જે આજે આદર્શ વિધા-સંકુલમાં માઁ અર્બુદાના સાંનિધ્યમાં "હેતીબા પ્રાથમિક શાળા" ના હુલામણા નામે લોકહૈયે વસી છે.

                શરૂઆતથી જ ઉત્સાહી અને પ્રોત્સાહક સંચાલકમંડળ તથા આગવી સૂઝ ધરાવતા સંનિષ્ઠ, કર્મઠ અને મહેનતુ કર્મચારીઓના કર્મયોગ થકી આ શાળા રૂમઝૂમતા શિશુ ઝરણામાંથી વિશાળ જલરાશિને સમાવતી મહાસરિતા બની. સમાજના ઉગતા પૌઘાઓ રૂપી શરૂઆતમાં ૪૦ જેટલા કુમળા બાળકોના સંસ્કાર તેમજ અક્ષરજ્ઞાનનું સિંચન કરતી આ શાળા આજે ધોરણ ૬ થી ૮ના ૭૯૭ બાળકોને સંસ્કાર સિંચન કરી રહી છે.આ શાળાએ નગરમાં,તાલુકામાં, જિલ્લામાં, રાજયમાં અને રાષ્ટ્રમાં એમ વિવિધક્ષેત્રે સફળતા મેળવી પોતાનું નામ ગૂંજતું કર્યું છે. શાળામાં અપાતા ગુણવત્તાયુકત શિક્ષણ અને બાળકના સર્વાંગી વિકાસ અંગેની વિવિધ  અભ્યાસપૂરક પ્રવૃતિઓ માટે સંચાલક મંડળ અને શાળાના આચાર્યશ્રી, નિરીક્ષકશ્રીઓ તથા શિક્ષકવૃંદ સતત ચિંતનશીલ અને પ્રયત્નશીલ છે.